الاسرة كل تفكيرها اول ماترزق بطفل يفكروا فى تربية الطفل وكل همهم يكون طفل مثالى مش بيغلط ..درجاته اعلى درجات ,بيصلى مؤدب أخلاق احسن مدرسة وده مش وحش بس مش سهلة تربية الطفل السوبر دى  فيها صعوبة شديدة ، الأوامر بتزيد والعقاب بيزيد وينسوا تماما أن فيه مصادر أخرى للتربية، الطفل يروح المدرسة ومع التعليم بيتربي من المعلمة والمعلم والاحتكاك بمشاكل زمايلة ،، يكبر شوية يدخل المراهقة ويدخل عالم جديد عاوز يعرف كل حاجة ودة تربية ، يكبر شوية ويبقي شاب ويدخل مرحلة انا فاهم كل حاجة وعاوز يجرب كل شئ ويعرف بنفسه الصح والغلط مهما كانت العواقب بس لسه مش بيتعلم من أخطائه وفيه شباب عارف ان ال بيعمله غلط وبرضه بيعمله ويخلق جواة انا حر ويشعر بحريته ..يدخل الجامعة ووقتها بيخطط لمستقبله ويحط رجله على الطريق ويشوف حلمه بيتحقق وفيه ناس تانية منتظره حد يحدد لها مستقبلها وحد يرسم الطريق ويعمل يداله كل حاجة حتى مذاكرته ودول تفكيرهم مشوش والرؤية غير واضحة ووقت كتير بيضيع منه فى اللهو واللغو ويتحجج بالظروف والمجموع والكلية والغلاء والاهل واعذاره لاتنتهى …

مع كل ده بيكون فيه تربية ومن مصادر كتير وكل حسب التجربة والموقف ال عدا مع الشخص مع مصدر التربية …لكن يبقي اهم تربية وتترك أثرها على المدى البعيد هى تربية النفس يعنى أنت تربي نفسك وتعرف الصح والغلط وتعاقب نفسك عند الخطأ وتثيب نفسك لما تصيب ، تفهم وتتعلم وتثبت نقاط قوتك وتضعف نقاط ضعفك وتقلبها نقاط قوة …تعالج عيوبك وتزود صفاتك ..تفهم نفسك وتعرف تعيش حياتك صح وبسعادة