البحر والمصايف زمان

• اليوم نتحدث عن (البحر والمصايف زمان).. وخاصة مع أصدقاء الطفولة بالمدارس والكليات.
• ودائما ما ارتبطت ذكرياتنا عن الصيف بالبحر والانطلاق فى الهواء تحت سماء تمتد فوق الشواطئ.
• وكان الكثير من الشعب المصري بيدور على الفرحة بأى حاجة بسيطة تسعده.. عشان كده الصيف كانت العائلات بتجهز نفسها للمصيف من قبله بشهور وطبعا كل عيلة عاملة جمعية علشان تتبسط فى المصيف.
• والمصايف زمان كانت بتاع الغلابة من الشعب المصري.. وكان عبارة عن الذهاب إلى بلطيم أو رأس البر أو مرسى مطروح.. أو الإسكندرية وخناقات الأهالي على مين يقعد على الشواطىء صف أول علشان يشوفوا ولادهم بالزحمة.
• وكان لازم كل عيلة بتصيف يكون موجود معها العوامة السودا (فردة الكاوتش الداخلي).. فاكرينها
• وفى الأسكندرية كان الخروج باليل على كورنيش إسكندرية من المندرة والعصافرة وميامي وسيدى بشر والتجمع فى أبوهاشم وعند بير مسعود والناس بترمي فلوس وتتمنى أمنية وتقولك هتتحقق أو تتفرج على شباب الأسكندرانية وهما بينطوا جوا البير ويطلعوا من الناحية التانية.. وكان العجمي والمعمورة مصيف الأغنياء.

• وزمان كنا نرى بعض فناني الزمن الجميل فمنهم من كان يتخذ من مرسى مطروح ملجئا له والبعض الآخر يفضل رأس البر.. ويلجأ آخرون إلى شواطئ الإسكندرية سعداء يشعرون بالرضا ويعودون الى أعمالهم بمنتهى الحماس.
• فكانت أم كلثوم تعشق رأس البر وكذلك كاريوكا وليلي فوزي وزهرة العلا.. ومريم فخر الدين سيدي بشر.. وماجدة وليلى مراد تفضلان شاطئ الغرام بمرسى مطروح.. فريد شوقي وهدى سلطان شاطئ المعمورة.
• أما الأن فقد أصبح الفنانين يتبارون في امتلاك أفخر الشاليهات والفلل والقصور على شواطئ مارينا.. والمراسي.. والدبلوماسيين.. والجولف.. وشارم الشيخ.. والجونة …. إلخ.

• وكلنا يعلم أننا زمان على البحر كنا نتغزل بلحظات حوار مع الطبيعة والجمال والهدوء.. ولكننا الآن فى هذه الأيام أصبحنا نعتدى على تلك الطبيعة.. وما احوجنا الآن إلى للعودة إلى تلك اللحظات وهذ الحنين كوسيلة للبحث عن ذاكرة جميلة نحملها جميعا لمواجهة القبح الذى نعيش فيه طول العام.
• وبالرغم من تشتت أصدقاء الزمن الجميل إلا أننا نأمل أن تجمعنا اقدارنا.. ..ذات يوم بعد ما عز اللقاء.. فاذا انكر خل خله.. وتلاقينا لقاء الغرباء.. لا تقل شئنا فان الحظ شااااااء.. فان الحظ شااااااء.. فان الحظ شاااااااء.

• والآن اذكر لكم بعض الامثال التى تتحدث عن الصيف والبحر:
1. برد الصيف أحد من السيف .
2. حصيرة الصيف واسعه.
3. عويل الصيف عويل الشتا.
4. حمار الصيف حمار الشتا.
5. ال ما بيحرت في الشتا يستعطى في الصيف.
6. حصيرة الصيف أوسع من الشتا.
7. ارميه البحر يطلع وفى بقه سمكه .
8. ادينى حظ وارمينى فى البحر .
9. اعمل الخير وارميه فى بحر جارى وان ضاع عند العبد ما يضعش عند البارى.
10. الحبيب بن الحبيبة ما لقاش فى البحر طيبة.
11. مركب الضراير سارت ومركب السلايف في البحر احتارت.
12. اعمل الطيب وارميه البحر.
13. البحر ما يتعكرش من ترعة .
14. جرى الرجالة زى بحر النيل و جرى الولاية زى نقط الزير.
15. ودانا البحر وجابنا عطشانين.
16. البحر يحب الزيادة.
17. خف شوية تعوم.
18. يعوم فى شبر ميّه.
19. ايش جاب البحر للترعة ده طلعة و ده طلعة.
20. البحر واحد و السمك ألوان.
21. البحر يروق و يتعكر.
22. الزعلان يشرب من البحر.
23. قال يا جحا عد موج البحر قال الجايات أكتر من الرايحات.
24. لا كل من ركب الخيل خيال و لا كل من سبح فى البحر عوام.
25. خف تعوم.
26. بحر الصيف واسع.

• والآن اهديكم بعض فيديوهات الزمن الجميل وذكرياته:
1) محمد قنديل- بين شطين ومية..

2) فيروز- شط اسكندريه..

https://www.youtube.com/watch?v=zOjHxAOxUJ0&feature=youtu.be

3) ليلى مراد- باحب اتنين سوا..

4) عبد الحليم حافظ- دقوا الشماسى..

https://www.youtube.com/watch?v=qh7SCIV_xK8&feature=youtu.be

5) داليدا – احسن ناس..

6) الأسكندرية اغنية يونانية..

https://www.youtube.com/watch?v=nzLndSyZyFU&feature=youtu.be

• كانت ايام جميلة بأهلها وناسها الطيبين.. الكل راض وبيحمد ربه على النعمة.. كان عهد جميل حاسد وعزول والبال مشغول.. راحت عوازلى وحسادى.. آآآآآآآهين يا زمان الطيبة والطيبين.. هل لك من عوده!!!