أيوة أيوة انا اللي عيالي ولاد المجنونة ،وبأمارة ايه منبقاش مجانين ؟بنكافح ونتعب ونتحمل نقد ميتحملوش تنين!
اشتغلتي؟؟ وحتسيبي العيال لمين وحتلاقيهم اكيد مأملين؟!
مشتغلتيش؟ ده انتي كده من المتخلفين وعيالك حيطلعوا مش مسؤولين !
رشيقة طبعا مانت فاضية وطول النهار بتبلبطي في البيسين .
تخنتي إخييية ده كده حتكسّحي وتتعبي تعب السنين واكيد من كتر الأكل والقعدة تحت البطاطين !
عيالك مش مذاكرين ، عيالك مش مستحميين…
ايه ده بتصرفي ولا كأن جوزك قاعد على بنك التأمين …
نازلين!! في الساقعة دي لا كده حيجيلهم انفلونزا يقعدوا في السرير أسبوعين .
وكمان مش عايزة تاكليهم ايس كريم ده كده حيطلعوا محرومين!
ايه ده مال عيالك ساكتين اكيد سايباهم قدام التلفزيون مرمّيين او قدام التابلت متخلفين…
باينهم عاملين مصيبة وساكتين! مالك قاعدة كده زي المبلطين
بيذاكروا ومؤدبين لا دول أكيد مكبوتين أو معوجين كده ومأسّدين ومعقدين … والا يا ترى عيالك منحرفييين!
هو صحيح مال جوزك سايباه مكرش كده ؟
وعيالك يا عيني معصعصين! مانت لو بتطبخي زي الشيف أسامة أو حتى الناس الطبيعيين مكانوش راحوا ياكلوا عند الناس التانيين !
وجوزك عينه زايغة بقاله أسبوعين.. اكيد طبعا مانت هاملاه ومش عاملاله زي الرقاصين !
ايه ده رايحة التمرين مع العيال المساكين يا حرام مش كفايه في المذاكرة متبهدلين وتلاقيكي بتشجعيهم زي المجانين
وبتعاقبيهم؟! انت مفترية ومن الناس اللي غير تربويين !
ايه ده استحملتي وسكتي كده بقيتي من الباردين… رديتي واتعصبتي كده انت من اللي مش مؤدبين.
والله احنا غلبانين !
بُرييه بُرييه لا انت كده من النكديين
طب اقعد نتفاهم !
لا انت كده من اللتاتين الخبازين العجانين !
مالك سرحانة وشكلك شايل طاجن ستك على مر السنين وبتتعصبي زي المجانين.
أيوة يا سيدي أنا مجنونة وعيالي ولاد مجنونة وكلنا ولاد مجانين… وكلمة واحدة حبهدلك وأروح عادي مستشفى المجانين ست وشايلة هم السنين بحمل وبولد وبشتغل وبشيل كل الطين تربية واكل وشرب وبمرّض ولا كأني شغالة في مستشفى بقالي سنين وبشجع وبضحك وبعيط وبصوّت وبشيل هم ميشلهوش من الرجالة غير على الأقل ستين! عايز تعتبرني مجنونة عادي مهو كل ده طبعا ميتحملوش العاقلين وياريته عاجب يا سيد العاقلين!!